عبّر الكابتن سيد عبد الحفيظ، مدير الكرة السابق بالنادي الأهلي، عن استيائه من الغموض الذي يحيط بقرار خصم 3 نقاط من الأهلي بسبب عدم خوض مباراة القمة أمام الزمالك، مطالبًا بإيضاح رسمي من النادي والجهات المختصة.
وفي تصريحات تلفزيونية، قال عبد الحفيظ: «أنا كأهلاوي، كنت محتاج أفهم إحنا مروحناش الماتش ليه؟ واتخصم منا 3 نقاط ليه؟ لو القرار اللي أخدته صح، يبقى اتعاقبت ليه؟».
وتساءل عن الجهة التي أصدرت قرار الخصم: «مين اللي خصملي النقاط؟ الرابطة؟ اتحاد الكرة؟ ولو الأهلي كان على حق، ليه اتعاقبنا؟».
ووصف عبد الحفيظ الوضع الحالي في الكرة المصرية بأنه «مشهد غير منظم»، مضيفًا: «بقينا نشوف فوضى وسط نظام ونظام وسط فوضى، وده بقى المعتاد من 8 سنين، سواء من الأندية أو الجهات المنظمة».
كما شدد على رفضه لفكرة خصم النقاط في حال كان الأهلي محقًا، موضحًا أهمية الحفاظ على الأرقام التاريخية في مباريات الديربي: «في أرقام بتفرق تسويقيًا وتاريخيًا، أنا مش قابل يتخصم مني نقطة لو أنا على حق، دي مباراة ديربي وليها قيمة كبيرة، ومكسب الأهلي فيها على مدار سنين مهم جدًا».
تصريحات سيد عبد الحفيظ تعكس حجم الاستياء داخل أوساط النادي الأهلي وجماهيره، في ظل غياب التوضيحات الرسمية بشأن تداعيات أزمة مباراة القمة الأخيرة والقرارات المتضاربة التي تبعتها.
