بردقوش: ليه يا جدو بقت كلمة «سامح» شتيمة؟
أنا: من خمستاشر سنة، وفي شهر رمضان، كان ممثل مغمور، ومالهوش أي عمل مميز أو الناس تفتكروا له!
ورغم وجود عشرات المسلسلات وبرامج الرغي، محدش جابه في دور ولو كومبارس!
بردقوش: معقول يا جدي! ده بيطلع في كل فيلم ومسلسل وفي الإعلانات وناقص يقرأ نشرات الأخبار!
أنا: وقتها عمل برنامج في تيك توك! مكتوب له بطريقة تعجب الطغاة والعوام! يعني كلام من نوعية إغسل يديك قبل الأكل وبعده! إسمع كلام أمك وأبوك! حب الحياة وابتسم!
بعدها بلحة حب يستغل نجاحه وشهرته، إستقبله مرتين في نفس الشهر!
وفي المرة التانية! سامح قال مش عايزين أجازات في الأعياد عشان ورانا شغل كتير قصده. وراهم (الشعب) شغل كتير! وعنها قام بلحة بإلغاء أجازات الأعياد للمسلمين والمسيحيين وكل أنواع الأجازات، العارضة والسنوية! واللي عايز أجازة تبقى على حسابه! ومن يومها والناس تلعنه وبقوا يشتموا بعض بإنت سامح ياض!!
بردقوش: طيب ليه الشعب ما اعترضش وغير القرار ده؟!
أنا: الشعب بتاعنا زي ما اتعود، عايز شعب تاني ييجي ويعترض ويغير الأوضاع! إحنا شعب عايز ينتصر ويحرر البلاد بس بشرط مانحاربش!
بردقوش: زيك يا جدو، مش بتصلي ولما نصلي تقول لنا إدعولي، ومش بتصوم ووقت الإفطار تقول لنا إدعولي! طيب هتدخل الجنة إزاي يا جدو؟
أنا: مش إنت بتصلي وبتصوم وبتطيع ربنا ما شاء الله عليك، هتدخل الجنة ولا النار؟
بردقوش: ان شاء الله الجنة يا جدو!
أنا: طيب إدعيلي أكون معاك!
ودمتم
